Kremlini paralajmëron hakmarrje për atentatin e dështuar ndaj Putinit

Keystone

Moska zyrtare ka akuzuar Kievin se është përpjekur të vrasë presidentin rus, Vladimir Putin, në një sulm të filmuar dhe të përhapura përmes Twitter-it, si dhe të transmetuara nga mediat ndërkombëtare.

Në një deklaratë, qeveria ruse thotë se Putin nuk ndodhej në Kremlin dhe shton se do të reagojë në momentin e duhur. I pyetur për përdorimin e dronëve më 9 maj, zëdhënësi i Kremlinit, Dmitry Peskov, tha se do të veprohet sipas rekomandimeve të shërbimeve të sigurisë, përcjell Albinfo.ch.

Ukraina ka mohuar të ketë lidhje me atë që ndodhi. Këshilltari i presidentit Zelensky, Mikhaylo Podolyak, deklaroi se ky sulm i dyshuar është justifikimi i Moskës për të sulmuar civilët ukrainas. Më vonë ai postoi edhe një video.

“Sa u takon dronëve ndaj Kremlinit, gjithçka është e qartë si kristali, por unë do të them diçka gjithsesi. Së pari, Ukraina nuk ka lidhje me të, sepse nuk ka vlerë ushtarake në aksione të tilla”, tha Mikhaylo Podolyak, këshilltar i presidentit ukrainas.

Ekzistojnë gjithashtu aludime se bëhet fjalë për një aksion të partizanëve rusë kundër klanit të presidentit Putin, që është dobësuar nga lufta. Sidoqoftë, dyshimet janë të shumta në Moskë kur mungojnë pak ditë nga parada e Ditës së Fitores./Albinfo.ch