Kriza e koronavirusit zvogëlon importin dhe eksportin në Kosovë

Pandemia e koronavirusit ka ndikuar në të gjitha sferat e ekonomisë.

Si pasojë e masave qeveritare të izolimit dhe mbylljes së bizneseve, ka rënë në mënyrë drastike importi dhe eksporti në Kosovë, rrjedhimisht është ulur edhe konsumi.

Sipas të dhënave të Doganave të Kosovës, vetëm për muajt mars dhe prill të këtij viti importi i produkteve ka shënuar rënie mbi 139 milionë euro, kurse eksporti i mallrave nga Kosovë në vende të tjera në mbi 3 milionë euro.

“Nga data 01.03. 2020 deri më 30.04.2020 importi i produkteve nga shtetet e tjera në Kosovë ka qenë mbi 441 milionë euro, nga mbi 580 milionë euro sa ka qenë në të njëjtën periudhë të vitit të kaluar”.

“Kurse eksporti nga mbi 61 milionë euro sa ka qene në muajt mars dhe prill të vitit të kaluar, ka rënë në 58 milionë euro”, ka thënë Adriatik Stavileci në një përgjigje për Radion Evropa e Lirë.

Paralelisht me importin, rënie ka pasur edhe konsumi, çka sipas ekspertëve për çështje ekonomike, kjo drejtpërdrejt ndikon në të hyrat buxhetore të shtetit.

Kjo, pasi vlera më e madhe e buxhetit mbushet nga të hyrat e Doganës së Kosovës dhe Administratës Tatimore të Kosovës, përcjell Albinfo.ch.