Avdullah Hoti kërkon ndalimin e të gjitha tubimeve publike

Kryeministri i Kosovës, Avdullah Hoti ka kërkuar nga qytetarët kujdes maksimal për ta përballuar valën e dytë të Covid-19, shkruan Albinfo.ch.

Përmes rrjetit social Facebook, Hoti ka shkruar se Evropa dhe vendet e rajonit tanimë janë përfshirë nga vala e dytë e pandemisë nga covid-19.

“Në Kosovë, shifrat e të prekurve nga dje janë bërë treshifrore, ndërkaq numri i të prekurve brenda 24 orëve është dyfish më i lartë se numri i të shëruarve”, ka shkruar Hoti, transmeton Albinfo.ch.

Për më tepër kryeministri kosovar ka listuar masat që janë ndërmarrë nganinstituxcionet vendore lidhur me menaxhimin e situatës me pandeminë:

1. SHSKUK ka planin për aktivizim të shtretërve shtesë në Prishtinë dhe në spitale regjionale, si dhe është bërë plani për ri-shpërndarjen e stafit mjekësor sipas nevojës.

2. Janë rritur kapacitetet testuese, duke mundësuar që pothuajse të gjithë ata që kanë nevojë për testim të testohen brenda ditës, dhe testimi së shpejti do të decentralizohet në regjione.

3. IKSHPK ka ngritur struktura rajonale të inteligjencës për të identifikuar vatrat infektive.

4. Në shkolla ka kontroll të shtuar.

5. Po rishikohen lista e vendeve me rrezik për të ndaluar udhëtimin nga ato vende, gjithmonë duke u bazuar në protokollet përkatëse.

6. Janë aktivizuar inspektoratet përkatëse për të mbikëqyrë zbatimin e masave.

7. Në baza të rregullta javore po koordinohemi me partnerët ndërkombëtarë që janë duke na mbështetur në përballimin e situatës.

“Por, na duhet të tregojmë kujdes maksimal në punë, në shkollë, në biznes, në rrugë dhe në çdo aktivitet ku ka grumbullim të njerëzve. Duhet të kemi mirëkuptim për të evituar të gjitha tubimet publike të çfarëdo natyre, ashtu siç rekomandohet nga Ministria e Shëndetësisë dhe IKSHPK”, ka shkruar Hoti.