Kryeministri Thaçi zhgënjen veteranët

Takimi i Këshillit të grevistëve të veteranëve të UÇK-së me kryeministrin Hashim Thaçi, në ditën e 60-të të grevës, ku i pranishëm ishte edhe ministri i Financave Bedri Hamza, nuk ka sjell ndonjë datë të saktë se kur do të procedohet Ligji për vlerat e luftës për miratim në Kuvendin e Kosovës.

Ndërsa veteranët të zhgënjyer u kanë bërë thirrje bashkëluftëtarëve dhe qytetarëve që t’i përkrahin të premten në protestën që do të mbahet në ora 12.00.

Kryetari i Këshillit për Mbrojtjen e të Drejtave të Luftëtarëve të UÇK-së, Xhevdet Qeriqi i zhgënjyer nga ky takim, ka thënë se arsyetimet e kryeministri Thaçi mbeten ende të njëjta dhe të pa baza, me premtimin se javën e ardhshme Ligji për vlerat e luftës do të procedohet në Kuvend.

Veteranët e UÇK-së, thonë se nuk do ta ndërprenë grevën dhe nuk do të pranojnë asnjë lloj dokumenti, por vetëm miratimin e Ligjit që e njeh të plotë luftën e UÇK-së dhe popullit për liri.

Veteranët e UÇK-së javën e kaluar patën paralajmëruar që nga greva do të kalojnë në protesta, por anuluan këtë plan pas premtimeve të kryeministrit Hashim Thaçi, se ligji do të procedohet në Kuvend më 20 korrik.