Kryeprokurori kërkon hetim për listat e publikuara të veteranëve

Foto ilustrim

Zyra e Kryeprokurorit të Shtetit në Kosovë ka kërkuar nga ana e Prokurorisë Themelore në Prishtinë që të nisë hetimet për të verifikuar nëse personat zyrtarë kanë kryer vepër penale me rastin e publikimit të listave të veteranëve të ish-Ushtrisë Çlirimtare të Kosovës.

Këtë deklaratë zyra e kryeprokurorit e ka bërë të ditur përmes një njoftimi dërguar mediave.

“Zyra e Kryeprokurorit të Shtetit ka kërkuar që të fillohen hetimet paraprake, për të verifikuar çdo veprim të personave zyrtarë në sistemin prokurorial dhe gjyqësor, si dhe të zyrtarëve apo personave të tjerë jashtë këtyre sistemeve, nëse të njëjtit kanë kryer vepër penale me rastin e publikimit të emrave të personave të përfshirë në listat e veteranëve apo pjesëtarëve luftëtarë të UÇK-së”, thuhet në njoftim.

Disa javë më parë, mediat kanë publikuar disa lista me emra të veteranëve përfitues.
Për këto lista kanë reaguar edhe prokuroria.

Gjithashtu në lidhje me keqpërdorim të pozitës apo autoritetit zyrtar, gjatë klasifikimit të veteranëve të ligjshëm dhe ndarjes së pensioneve për ta, është ngritur aktakuzë ndaj 12 personave.