Kryesia e Kuvendit miraton formimin e komisionit për ndryshime kushtetuese

Jakup Krasniqi, ka deklaruar se në seancën parlamentare që do të mbahet më 22 prill, do të legjitimohen këto dy komisione

Kryesia e Kuvendit ka miratuar kërkesën për formimin e komisionit për amendamentime kushtetuese për mënyrën e zgjedhjes së presidentit dhe komisionit për reformën zgjedhore.

Pas mbledhjes së kryesisë, kryetari i Kuvendit, Jakup Krasniqi, ka deklaruar se në seancën parlamentare që do të mbahet këtë të premte, më 22 prill, do të legjitimohen këto dy komisione dhe do të zgjidhet guvernatori i Bankës Qendrore të Kosovës.

Ndërsa, shefi i Grupit Parlamentar të LDK-së, Ismet Beqiri, ka thënë se nuk duhet të humbet kohë dhe të bëhen ndryshimet e nevojshme në Kushtetutë dhe në Ligjin zgjedhor.

Nga ana tjetër, kryekuvendari Krasniqi ka thënë se Kryesia nuk mund të shkarkojë kryetarë të komisioneve parlamentare, meqë një gjë të tillë e kishte kërkuar javën e kaluar deputeti i PDK-së, Bekim Haxhiu, që deputeti i Vetëvendosjes, Florin Krasniqi, të shkarkohet nga pozita e kryetarit të Komisionit për mbikëqyrjen e Agjencisë Kosovare të Inteligjencës.