Kryetari i BDI-së u dërgon letra ndërkombëtarëve për shqetësimet rreth zhvillimeve politike në Maqedoninë e Veriut

Ali Ahmeti, FB

Kryetari i Bashkimit Demokratik për Integrim (BDI), Ali Ahmeti, ka njoftuar se ka dërguar letra presidentes dhe kryeministrit të Kosovës, Vjosa Osmani dhe Albin Kurti, presidentit dhe kryeministrit të Shqipërisë , Bajram Begaj dhe Edi Rama, presidentes së Komisionit Evropian, Ursula von der Leyen, kancelarit gjerman, Olaf Scholz, presidentit të Francës, Emmanuel Macron dhe sekretarit të Shtetit të SHBA-së, Antony Blinken.

Me anë të këtyre letrave ai ka shprehur shqetësimin e tij për zhvillimet e fundit politike dhe kushtetuese në Maqedoninë e Veriut, që rrezikojnë arritjet e Marrëveshjes së Ohrit dhe parimet e barazisë dhe stabilitetit në shtetin shumetnik.

Ahmeti ka theksuar se tri vendime të fundit – planet për shfuqizimin e Ligjit për Përdorimin e Gjuhëve, ndalimi i identifikimit të përkatësisë etnike në institucionet shtetërore dhe formimi i një shumice qeverisëse pa përfaqësim të drejtë të komuniteteve etnike – përbëjnë kërcënime serioze për paqen dhe stabilitetin e vendit dhe të rajonit në tërësi. Ai u bën thirrje udhëheqësve ndërkombëtarë për veprim të përbashkët për mbrojtjen e arritjeve të Marrëveshjes së Ohrit dhe të të drejtave të shqiptarëve në Maqedoninë e Veriut.