Kualiteti i jetës në Zvicër, më i mirë se para 10 vitesh

Keystone

Sipas një studimi të realizuar nga Zyra Federale për zhvillim hapësinor, në 17 kantone të Zvicrës është shënuar një rritje e ndjeshme e kualitetit jetësor në krahasim me kohën para dhjetë viteve.

Ndër treguesit për këtë përmirësim janë zvogëlimi i numrit të aksidenteve, ulja e koeficientit të zhurmës nga trafiku etj. Kjo e fundit ka shënuar përmirësim të dukshëm në 17 kantone, në krahasim me studimin e realizuar në vitin 2005, u tha në publikimin e studimit më të ri, të bërë sot në Bernë.

Rënia më e madhe e numrit të aksidenteve është regjistruar në kantonet Schwyz, Tesinë dhe Valis, shkruan sda.ch. Përqindja e vdekjeve të parakohshme ka rënë në 16 nga 17 kantonet e trajtuara dhe ky është një tregues për përmirësimin e përgjitshëm të gjendjes shëndetësore të popullatës.

Përmirësime, edhe pse jo në nivel të mjaftueshëm, janë regjistruar edhe sa i përket kualitetit të ujit. Uji është më cilësor se para dhjetë viteve vetëm në 4 nga 17 kantonet e përfshira në studim.

Ndër treguesit negativë që zbulon ky studim është rritja në të gjitha kantonet e përqindjes së shfrytëzuesve të ndihmave sociale.

Ky raport realizohet një herë në dy vite.