Kuçi: Marnhac “ka rrëshqitur”, deklarata e tij, e pamatur

Sipas Kuçit, institucionet e Kosovës nuk bëjnë asnjë kompromis dhe asnjë marrëveshje me askënd për zbatimin e ligjeve të Kosovës

Zëvendëskryeministri dhe ministri i Drejtësisë së Kosovës, Hajredin Kuçi, ka thënë në emisionin “Interaktiv” të KTV-së se shefi i EULEX-it, Marnhac, ka rrëshqitur pak. Sipas Kuçit, ai ka bërë një deklaratë të pamatur dhe pa u konsultuar paraprakisht me të.　

Në këtë mënyrë i ka vlerësuar deklarimet e shefit të EULEX-it, Marnhac, lidhur me deklarimin se kthimi i ligjit dhe i gjyqtarëve në veri të Kosovës duhet të ketë një marrëveshje politike me autoritetet e Serbisë.　

Sipas Kuçit, institucionet e Kosovës nuk bëjnë asnjë kompromis dhe asnjë marrëveshje me askënd për zbatimin e ligjeve të Kosovës.　Ai, ka deklaruar se është duke bërë presion të vazhdueshëm për vendosjen e gjyqtarëve vendorë në gjykatën në veri të vendit.

Ndërkaq, kryetari i Këshillit Gjyqësor të Kosovës, Enver Peci, e ka quajtur të dështuar EULEX-in. “Për çështjen e gjykatësve po del se po vendos Beogradi”, ka thënë Peci.