Kundërshtohet rrënimi i objektit të Qendrës së Kulturës në Vushtrri

Shoqëria civile dhe qytetarët në Vushtrri po kundërshtojnë rrënimin e objektit të Qendrës së Kulturës “Hasan Prishtina”.

E ndërtuar në vitin 1950, e cila dikur funksionoi si Shtëpia e Armatës Serbe, objekti i Shtëpisë së Kulturës në Vushtrri nuk është i njëjti më.

Sipas tyre, me këtë veprim, Komuna ka rrënuar kujtesën dhe të kaluarën e qytetit.  Ata thonë se do të duhej të kishte rinovim apo ndonjë mënyrë tjetër të adaptimit. Me vendimin për rrënim nuk po pajtohen as qytetarët, përcjell albinfo.ch.

Por, kryetari Xhafer Tahiri ka thënë se nuk ka pasur zgjidhje tjetër, pasi në të kundërtën, Komuna do të kishte pësuar dëme të mëdha financiare.

Ai thotë se paraprakisht për këtë është konsultuar me Ministrinë e Kulturës dhe me Komisionin Rregullativ të Prokurimit Publik.