Thaçi: Kur krimineli emërohet ligjërues në serbi, ky është veprim i shëmtuar

Sipas Thaçit, Llazareviq do t’i mësojë gjeneratat e ardhshme jo vetëm si t’i urrejnë popujt tjerë jo serbë në Ballkan, por si ta urrejnë edhe NATO-n dhe BE-në

Presidenti i Kosovës, Hashim Thaçi ka reaguar ashpër kundër lajmit se i dënuari për krime lufte nga Tribunali Penal i Hagës, Vlladimir Llazareviq do të nis ligjërimin në Akademinë Ushtarake të Serbisë si “patriotë”. Thaçi tha se si ligjëruesi ai do të kujdeset që dijen dhe përvojën e tij kriminale dhe gjenocidiale ta përçojë tek gjenerata e ardhshme.

Ai ka shkruar në Facebook se nuk është çudi për askënd në Serbi, por do të duhej të ishte shqetësuese për çdokënd në BE-ne dhe shtetet anëtare të saj.

“Nuk e paragjykoj reagimin e BE-së dhe me vëmendje dhe durim do ta pres një të tillë. Por, nuk e di çfarë ka më të shëmtuar se fakti që një i dënuar për krime lufte kundër njerëzimit, do ligjëroj në Akademinë Ushtarake të Serbisë. Ai do të ligjërojë me krenari për strategjitë dhe metodat moderne që regjimi i tij dhe vetë ai, ka përdorur gjatë shekullit të kaluar në përpjekjet e tyre për spastrim etnik në Kosovë”, tha Thaçi.

Sipas Thaçit, Llazareviq do t’i mësojë gjeneratat e ardhshme jo vetëm si t’i urrejnë popujt tjerë jo serbë në Ballkan, por si ta urrejnë edhe NATO-n dhe BE-në.

“Pra, ligjëruesi do të kujdeset që dijen dhe përvojën e tij kriminale dhe gjenocidiale ta përçojë tek gjenerata e ardhshme. Tani mbetet të shihet se si do ta përshpejtojë apo ngadalësojë një veprim i tillë anëtarësimin e Serbisë në BE”, ka shkruar presidenti i Kosovës në Facebook.

Ndryshe, ish-komandanti i korpusit të Prishtinës dhe i Armatës së Tretë të Ushtrisë së Jugosllavisë, gjenerali në pension dhe i dënuari i Hagës për krime lufte në Kosovë, Vlladimir Llazareviq, së shpejti do të nisë ligjërimin në Akademinë Ushtarake të Serbisë, shkruan sot “Novosti” i Beogradit. Ai ështç dënuar nga Haga për krime lufte në Kosovë.