Kurteshi: Të ndiqet penalisht gjyqtari Kalludra

Kurteshi ka thënë se vendimi për arrestimin dhe dhënien e masës së paraburgimit për tre deputetët e Lëvizjes Vetëvendosje është i paligjshëm

Deputeti i Lëvizjes Vetëvendosje, Sami Kurteshi, në një konferencë për media ka folur për arrestimin e deputetëve të kësaj partie si dhe për procesin e rinumërimit të votave për kryeqytetin dhe Prizrenin, transmeton albinfo.ch.

Kurteshi ka thënë se vendimi për arrestimin dhe dhënien e masës së paraburgimit për tre deputetët e Lëvizjes Vetëvendosje është i paligjshëm. “Deputetët kanë bërë kërkesë për përjashtimin e trupit gjykues në çështjen e tyre. Kjo ka të bëjë me krejt trupin gjykues, sidomos me gjykatësin Beqir Kalludra, për shkak se ka dyshime në paanësinë e tij.

I njëjti trup gjykues është i përfshirë edhe në rastin e aktivistëve tanë, tashmë të dënuar. Por fletëarresti për deputetët tanë është bërë një ditë pas bërjes së kësaj kërkese. Verpimi i tillë i gjyqtarit Kalludra përbën vepër penale”, ka thënë Kurteshi.

Deputeti i Lëvizjes Vetëvendosje, ka kërkuar që Komisioni Qendror i Zgjedhjeve të rinisë numërimin e rregullt të votave të balotazhit në Prishtinë dhe Prizren.