Kurti: Askush nuk u gjykua për krimin ndaj familjes Jashari

Kurti në Prekaz, drejtësia për familjen Jashari ende nuk ka nisur

Lideri i Lëvizjes Vetëvendosje, Albin Kurti, ka thënë se secili anëtar  i familjes Jashari sakrifikoi për këtë vend. Mirëpo, siç tha ai, drejtësia për sulmin e Serbisë as ndaj kësaj familjeje nuk ka nisur.

Kështu tha Kurti derisa bëri homazhe në Kompleksin Memorial “Adem Jashari” në Prekaz në ditën e dytë të Epopesë së UÇK-së.

“Për këtë sulm shtetëror të Serbisë ndaj familjes legjendare Jashari askush nuk është gjykuar dhe nuk ka pasë asnjë gjykim që dikush të dënohet. Drejtësia është vonuar dhe as s’ka filluar, prandaj ne duhet të angazhohemi që kjo të ndryshojë për hir të Republikës së Kosovës, për hir të pasardhësve të Jasharëve dhe për hir të kombit tonë”, tha Kurti.

Kurti shprehu nderimet e tij për familjen Jashari.

“Me nderim të përjetshëm përulemi para jetës, veprës dhe rënies së Jasharëve, kryekomandantit Adem Jashari që e deshën pakrahasimisht më shumë vendin tonë sesa veten e tyre. Dashuria, kujdesi dhe përgjegjësia institucionale janë mënyra më e sigurt që edhe ne ta duam vendin tonë”.

---