Kurti: Çmimi i vajit u kurdis, do të ndëshkohen manipuluesit

Gjatë debatit parlamentar për çmimet kryeministri Albin Kurti ka thënë se rritja enorme e çmimeve gjatë ditëve të fundit në Kosovë është shqetësim i çdo qytetari në vend.

Kurti paralajmëroi se do të ndëshkohen të gjithë ata tregtarë që manipulojnë me çmimet.

“Rritja e çmimeve është shqetësim i çdo qytetari, ne si qeveri jemi duke punuar në vazhdimësi që të mbështesim qytetarët, e sidomos ata që janë më të cenueshëm. Krizat na prekin të gjithëve, ndonëse jo të gjithëve njësojë. Ne kemi shtuar kontrollin e mbikëqyrjen dhe do t’i ndëshkojmë ata që manipulojnë, ashtu siç u dëshmua pak ditë më parë, ku ka të tillë që synojnë përfitim në emër të krizës. Madje, fitimin e duan si super profit. Janë inspektuar e po vazhdojnë të inspektohen operatorë ekonomikë në tërë Kosovën[…] të gjitha ata shitës që manipuluan me çmimet në kurriz të qytetarëve duhet të ndëshkohen e do të ndëshkohen. Çmimi prej 3 euro e 49 centë për një litër vaj ishte hapur kurdisje”, tha ai, transmeton Albinfo.ch.

---