Kurti: Deklaratat e Haki Abazit, të pavërteta dhe të pasakta

Pas deklaratave të Haki Abazit, ka reaguar edhe kryeministri i Kosovës, Albin Kurti, duke thënë se akuzat e deputetit të Vetëvendosjes, Haki Abazi, janë të pavërteta dhe të pasakta, përcjell albinfo.ch.

“Ato nuk janë të vërteta e as të sakta. Për këtë është përgjigjur ministrja e Drejtësie. LVV është subjekti më i madh dhe më demokratik. Unë nuk mund të mbaj përgjegjësi për fjalën publike të dikujt”, ka thënë shkurt Kurti para mediave.

Deputeti i Lëvizjes Vetëvendosje, Haki Abazi, aktualisht është duke u intervistuar në Prokurorinë Speciale lidhur me deklaratat e tij për rastin e Astrit Deharit.

Deputeti i VV-së do të intervistohet nga Prokuroria për deklaratat që i tha për rastin e zhdukjes së mostrave të ish-aktivistit të LVV-së, Astrit Dehari.

Ai javën e kaluar kishte kërkuar nga Prokuroria që të merret në pyetje kryeministri i vendit, Albin Kurti, për zhdukjen e mostrave të Astrit Deharit, nga Instituti i Mjekësisë Ligjore (IML).

Abazi gjatë një konference për media kërkoi po ashtu që prokuroria të marrë në pyetje edhe ministren e Drejtësisë, Albulena Haxhiu.