Kurti dhe Mustafa bisedojnë për mundësinë e rrëzimit të Qeverisë

Kryetari i Lëvizjes Vetëvendosje (VV), Albin Kurti, është takuar sot me kryetarin e Lidhjes Demokratike të Kosovë (LDK), Isa Mustafa.

Në një postim në faqen e tij në Facebook, Kurti ka thënë se me Mustafën kanë biseduar për situatën politike dhe iniciativën për mocionin e mosbesimit ndaj qeverisë.

“Kosova ka nevojë për zhvillim ekonomik, e jo për korrupsion institucional. Qytetarët duan qeverisje të re, të mirë e të drejtë dhe jo keqqeverisje që na e rrit borxhin, zhvat buxhetin dhe falimenton ndërmarrjet. U pajtuam që t’i bëjmë përgatitjet e nevojshme për rrëzimin e qeverisë”, ka shkruar Kurti, përcjell albinfo.ch.

Megjithatë, për të pasur sukses një mocion për rrëzimin e Qeverisë, nevojiten 61 nga 120 votat e deputetëve të Kuvendit të Kosovës.

Tri partitë opozitare, Lidhja Demokratike e Kosovës, Lëvizja Vetëvendosje dhe Partia Socialdemokrate i kanë gjithsej 56 deputetë në Kuvendin e Kosovës dhe për suksesin e një mocioni të mosbesimit për Qeverinë, nevojiten edhe 5 vota.