Kurti: Integrimi në BE, pjesë e agjendës shtetërore

Sot është mbajtur mbledhja e parë e Këshillit Ministror për Integrim Evropian i Qeverisë së Kosovës, përcjell albinfo.ch.

Kryeministri Albin Kurti ka thënë se kërkesat e përcaktuara nga Bashkimi Evropian do të trajtohen me seriozitet nga ana e Qeverisë.

“Kërkesat dhe kriteret që dalin nga procesi i integrimit në BE-në për vendin tonë në kuptimin e standardeve që duhen arritur, do të trajtohen me seriozitetin e duhur dhe përkushtim. Në aspiratat tona shtetërore për të qenë një shtet i zhvilluar, me ekonomi të qëndrueshme dhe vend demokratik, ku sundon ligji dhe drejtësia, standardet e BE-së duhet të jenë udhërrëfyes. Prandaj, agjendën e integrimit evropian duhet ta shohim si agjendë integruese të agjendës qeveritare dhe shtetërore”, ka thënë ai.

Po ashtu, Kurti ka shtuar se është përgjegjësi e Kosovës të përmbushë kriteret dhe standardet që kërkohen, ndërsa shtoi se do të kërkojë përgjegjësi nga ministrat për reformat konkrete që kërkohen të zbatohen, shkruan kohanet.

“Një nga përfitimet direkte të qenit në proces të integrimit në BE është skanimi dhe pasqyrimi i punës që na bëhet në BE në secilën fushë. Kjo e lehtëson shumë punën tonë dhe timen, sepse e kam më të lehtë të shikoj procesin dhe të kërkoj përgjegjësi nga ju aty ku ka dështime dhe vonesa. Do të kërkohet përgjegjësia nga ministrat për reformat konkrete që duhet të ndiqen e zbatohen dhe të gjithë zyrtarët publikë për përgjegjësitë e secilit. Agjenda e Integrimit Evropian duhet të jetë e mishëruar nëpër planet e punës nëpër institucionet e punës”, ka thënë ai.