Kurti: Investimet e huaja në Kosovë janë rritur për 53%

Kryeministri Albin Kurti priti dje në takim deputetët e Parlamentit gjerman, Christian Petry nga Partia Social Demokrate SPD dhe Boris Mijatović, nga Partia e Gjelbër, përcjell albinfo.ch.

Në njoftimin e Qeverisë thuhet se Kurti u ka thënë deputetëve gjermanë se sipas Bankës Qendrore të Kosovës, rritja ekonomike në Kosovë është 9.9 %, e që pohon se përbën rritjen më të madhe ekonomike që nga shpallja e pavarësisë.

“Buxheti i vitit 2022 është buxheti më i madh ndonjëherë në Republikën e Kosovës, me një rritje prej 12% krahasuar me buxhetin e vitit të kaluar”.

“Bazuar në indikatorët ekonomikë, ekonomia vendore po performon mirë, me rritjen e të hyrave doganore për mbi 1/3, krahasuar me vitin paraprak. Ndërsa eksportet janë rritur me 66%, të hyrat buxhetore janë rritur për 30%, e investimet e huaja për 53%”, citohet t’u ketë thënë Kurti.

Ndërsa, sipas njoftimit, deputetët gjermanë theksuan që te politikëbërja gjermane do të ketë vëmendje të shtuar për Kosovën dhe rajonin, si dhe premtuan mbështetjen e tyre për objektivat e përbashkëta.