Kurti: “Këta njerëz edhe pavarësinë e vrasin”

Kryetari i Vetëvendosjes, Albin Kurti, ka kritikuar Presidentin e Kosovës, Hashim Thaçin, duke thënë se ky i fundit po bën pazar me shtetin kosovar.

“ Me 13 pika, me 16, me 17, me 22 pika! Sepse i ashtuquajturi president i Kosovës e ka vënë shtetin tonë në pazar dhe po thotë se u bë aksham. Kosovën don ta çmontojë dhe ta falë ose shesë pjesë-pjesë: dikujt Trepçën, tjetërkujt Ujmanin, me përqindje KEK-un, Mitrovicën ta bëjë Bërçko, kishat e manastiret ortodokse Hilandar, dhe, statuse speciale gjithandej diku 35 e diku 99 vjet”, ka shkruar Kurti.

Sipas tij njerëzit e tillë e vrasin edhe pavarësinë e Kosovës.

“Çka i bie kjo, si Bosnja, si Palestina apo si Hong Kongu? Paj, të trija këto. Ama në fund të dialogut na vjen njohja, thotë edhe qeveria porsi ai – pra, do të njihet ajo që mbetet nga Kosova, ndërkohë që e kanë pranuar mosnjohjen e Serbisë. Këta njerëz edhe pavarësinë ta varin”, ka shkruar Kurti në rrjetin social Facebook.