Kurti kundër zgjedhjeve të reja, Hamza paralajmëron ndryshim qëndrimesh për presidentin

Afati për zgjedhjen e presidentit përfundon më 6 tetor, ndërsa partitë parlamentare ende nuk kanë siguruar marrëveshje për kandidatin.

Kryetari i Lëvizjes Vetëvendosje, Albin Kurti, ka deklaruar se zgjedhjet e reja do të ishin të panevojshme nëse Kuvendi aktual mund ta zgjedhë presidentin e ri të Kosovës. Ndërkohë, kryetari i PDK-së, Bedri Hamza, ka thënë se zhvillimet e fundit kanë krijuar rrethana të reja dhe se partia e tij mund t’i përshtatë qëndrimet lidhur me çështjet që kanë të bëjnë me të ardhmen e shtetit, përcjell albinfo.ch.

Kurti ka theksuar se Kuvendi aktual e ka mandatin dhe përgjegjësinë për zgjedhjen e presidentit, duke rikujtuar se në Kosovë presidenti nuk zgjidhet përmes zgjedhjeve të drejtpërdrejta.

“Nëse nuk do të arrijmë të zgjedhim president të ri, do të shkojmë në zgjedhje. Zgjedhjet e reja janë të panevojshme. Kemi Kuvend dhe ky Kuvend mund t’i japë vendit president ose presidente”, ka thënë Kurti në takimin e Këshillit Ministror për Integrim Evropian, raporton EO.

Sipas vendimit të Gjykatës Kushtetuese, afati 60-ditor për zgjedhjen e presidentit ka filluar më 8 gusht 2026 dhe përfundon më 6 tetor 2026. Gjykata ka konstatuar se kalimi i afatit kushtetues për konstituimin e Kuvendit ka shkaktuar fillimin e afateve për zgjedhjen e presidentit dhe të Qeverisë.

Për çështjen e presidentit ka folur edhe kryetari i PDK-së, Bedri Hamza. Pas mbledhjes së Këshillit Drejtues të partisë, ai ka deklaruar se situata aktuale paraqet “rrethana të reja” dhe se qëndrimet e PDK-së mund të përshtaten në përputhje me zhvillimet dhe interesat që lidhen me të ardhmen e shtetit.

“Jemi në rrethana të reja, në gjendje në të cilën s’ka të bëjë me të kaluarën, ka të bëjë me individë, ka të bëjë me shtetin dhe të ardhmen e shtetit. Dhe mbi bazën e këtyre rrethanave të reja, ne normalisht i ndërrojmë dhe i përshtatim qëndrimet tona”, ka deklaruar Hamza.

Ai ka thënë gjithashtu se në një situatë të tillë janë të nevojshme takimet dhe bashkëbisedimi ndërmjet liderëve politikë. I pyetur nëse PDK-ja do ta votonte një kandidat të Vetëvendosjes për president, Hamza është përgjigjur se nuk dëshiron të flasë për situata hipotetike.

Çështja e zgjedhjes së presidentit është diskutuar edhe më herët ndërmjet partive parlamentare. Kurti dhe kryetari i LDK-së, Lumir Abdixhiku, kishin njoftuar për një marrëveshje rreth kandidaturës së Bekim Sejdiut për president, por gjashtë deputetë të LDK-së kishin dalë kundër saj. Kjo ka lënë të pasigurt kuorumin e nevojshëm për votimin e presidentit.

Nëse presidenti nuk zgjidhet brenda afatit kushtetues, çështja mund të çojë vendin drejt një tjetër procesi zgjedhor, ndërsa partitë parlamentare vazhdojnë diskutimet për gjetjen e një zgjidhjeje./Albinfo.ch.

---