Kurti: Për dy ditë zhvilluam 17 takime bilaterale me liderë nga Evropa dhe bota

Kryeministri i Kosovës, Albin Kurti, ka thënë se për dy ditë sa qëndruan në Mynih, bashkë me zëvendëskryeministren Donika Gërvalla kanë zhvilluar 17 takime bilaterale e biseda me liderë e përfaqësues nga Evropa dhe bota, përcjell albinfo.ch.

Kurti ka shkruar në Facebook se për marrëdhëniet bilaterale dhe fushat e bashkëpunimit kanë biseduar me kryeministren e Estonisë, Kaja Kallas, me kryeministrin e Bullgarisë, Kiri Petkov dhe me kryeministrin e Maqedonisë së Veriut, Dimistar Kovaçevski.

“Kurse bashkë me presidenten Vjosa Osmani-Sadriu takuam kryeministrin grek Kyriakos Mitsotakis, ku theksuam rëndësinë e njohjes së shtetit të Kosovës nga Greqia, si hap i radhës, i natyrshëm, drejt thellimit të mëtutjeshëm të raporteve mes dy shteteve tona”, ka thënë ai.

Ndërkohë që ka përmenendur edhe takimet me Josep Borrell dhe Miroslav Lajçak.

“Në takime të ndara me Përfaqësuesin e Lartë të Bashkimit Evropian, Josep Borrell, dhe me Përfaqësuesin Special të Bashkimit Evropian, Miroslav Lajçak, diskutuam për procesin e dialogut ndërmjet Kosovës dhe Serbisë. Ndërkaq në takimin me Komisionerin e Bashkimit Evropian për Buxhet dhe Administratë, Johannes Hahn, kërkuam dhe morëm premtim për më shumë mbështetje financiare dhe teknike në fushën e arsimit dhe punësimit të të rinjve”, ka shkruar ai.

Ai ka treguar edhe për takimet e tjera:

Po ashtu takuam ministren e Punëve të Jashtme të Australisë, Marise Payne, ministren e Punëve të Jashtme të Suedisë, Ann Linde, zëvendëskryeministrin dhe ministrin e Punëve të Jashtme të Jordanisë, një prej shteteve të para të Lindjes së Mesme që e kanë njohur Republikën tonë, Ayan Safadi dhe ministrin gjerman të Ushqimit dhe Bujqësisë, Cem Ozdemir. Të gjithë i falënderuam për marrëdhëniet e mira dhe i shkëmbyem zotimet tona për përparimin e tyre.

Ditën e dytë e filluam herët me takimin me Senatoren amerikane të shtetit të Iowa-s, miken e Kosovës, Joni Ernst, të cilës i shprehëm mirënjohje për mbështetjen e vazhdueshme nga Shtetet e Bashkuara të Amerikës.

Me zëvendëskryeministren Gërvalla zhvilluam takime dhe me udhëheqësit e subjekteve politike gjermane, kryesuesin e SPD-së gjermane, Lars Klingbeil, me kryetarin e Unionit Kristian Demokratik të Gjermanisë, Friedrich Merz dhe me bashkëdrejtuesin e Partisë së Gjelbër gjermane, deputetin Omid Nouripour.

Gjithashtu, takuam edhe lideren opozitare të Bjellorusisë, Sviatlana Tsikhanouskaya dhe Përfaqësuesin e Lartë për Bosnjë e Hercegovinë, Christian Schmidt.

Mundësitë dhe potencialin për investime në Kosovë i prezantova gjatë një dreke pune me ndërmarrës dhe investitorë të huaj në kuadër të Forumit Angermyer të Politikës dhe Inovacionit.

Si pjesë e panelit të titulluar “Humbur në tranzicion: Sfidat dhe perspektivat e llogaridhënies dhe drejtësisë tranzicionale”, ritheksova domosdoshmërinë e hapjes së arkivave shtetërore në Serbi, pasi krimet e kryera në Kosovë ishin krime të kryera nga shteti i Serbisë. Kurse në panelin “Rezistenca e fushëbetejës: Forcat rezervë, si mbështetje e nevojshme për Forcat e Armatosura” fola për buxhetin tonë të rritur për Forcat e Sigurisë së Kosovës dhe për përkushtimin e Qeverisë për modernizimin e ushtrisë.

Çështja e personave të zhdukur me dhunë gjatë luftës së fundit në Kosovë, ishte tema e takimit me Presidentin e Komitetit Ndërkombëtar të Kryqit të Kuq (ICRC), Peter Maurer.

 

---