Kurti: Rregullorja e BQK-së nuk kthehet prapa

Kryeministri Albin Kurti ka deklaruar se i qëndron prapa rregullores së re të Bankës Qendrore të Kosovës për zbatimin e euros si monedhë e vetme e vendit. Kurti tha se qeveria nuk do të ndërhyjë në zbatimin e rregullores së Bankës Qendrore, e cila hyri në fuqi më 1 shkurt.

Duke folur në një intervistë për “Bloomberg” në Londër, shefi i ekzekutivit kosovar përsëriti se serbëve etnikë do t’u jepet kohë për t’u përshtatur.

Ai theksoi se nuk mund ta kthejnë këtë vendim, ndërsa shtoi se nuk do të ketë asnjë lloj mase ndëshkuese, pasi nuk duan ta ndëshkojnë askënd.

“Nuk mund ta zhbëjmë këtë vendim. Pra, ata kërkuan për më shumë kohë dhe ne po u japim më shumë kohë. Tani, edhe partnerët tanë amerikanë dhe evropianë po thonë se rregullorja është ligjore, sepse po lufton financimin e terrorizmit, aktivitetet e paligjshme, por ne nuk duhet të ngutemi shumë në zbatimin e plotë. Dhe kështu do të veprojmë gjatë shkurtit”, tha Kurti.

Kurti më tej theksoi se partnerët tanë SHBA e BE thonë se rregullorja e BQK-së është legale. Ai sqaroi se përmes përdorimit të dinarit bëhen financime të terroristëve etj.

Kurti tha se ai dëshiron që ata të integrohen në shoqëri, teksa shtoi se shumica e serbëve thuajse janë pajisur me letërnjoftime dhe pasaporta të Kosovës.

“Ne duam t’i integrojmë në shoqërinë tonë. Ata kanë dokumentacione identifikuese kosovare, pasaporta kosovare. Problemi nuk janë serbët e Kosovës, problemi është regjimi autokratik në Beograd, që është bashkëpunëtor rus. Është regjim që varet nga Kremlini”, deklaroi Kurti.

Ai shtoi se regjimi i Beogradit është duke e bërë alarmim paraapokaliptik, duke nxitur tensione etnike, sepse ata duan të shkaktojnë probleme në rajon.

Kryeministri Kurti tutje vuri në dukje arsyen e fitores së tij në zgjedhjet e vendit përmes maksimës Drejtësi dhe punë, duke shtuar se drejtësia integron njerëzit.

Kurti mes tjerash shtoi se do paqe dhe siguri, por që kjo të arrihet përmes demokracisë, përmes sundimit të ligjit.

“Duam paqe e siguri, por kjo të arrihet përmes rrugës demokratike, përmes sundimit të ligjit”, deklaroi Kurti.