Kryeministri i Republikës së Kosovës, Albin Kurti, është takuar me kancelarin federal të Gjermanisë, Friedrich Merz, në margjinat e Samitit XIII të Procesit të Berlinit, i cili po mbahet në Mal të Zi, transmeton albinfo.ch.
Përmes një njoftimi, Kurti bëri të ditur se gjatë bisedës ka pranuar urimet e kancelarit gjerman për mandatin e ri, ndërsa ka vënë në pah rëndësinë e bashkëpunimit ndërmjet Kosovës dhe Gjermanisë.
Kreu i Qeverisë së Kosovës theksoi rolin e Gjermanisë në themelimin e Procesit të Berlinit në vitin 2014, si një platformë që synon forcimin e bashkëpunimit rajonal dhe avancimin e integrimit evropian të gjashtë vendeve të Ballkanit Perëndimor.
Ai përmendi gjithashtu marrëveshjet e arritura në kuadër të këtij procesi për udhëtimin me letërnjoftime dhe njohjen e diplomave, duke theksuar se zbatimi i tyre është i rëndësishëm për të gjithë rajonin.
Në fokus të deklarimit të Kurtit ishte edhe bashkëpunimi ekonomik me Gjermaninë. Sipas tij, investimet e drejtpërdrejta gjermane në Kosovë arrijnë në rreth 1.5 miliardë euro, prej të cilave 62 për qind janë realizuar gjatë pesë viteve të fundit.
Kurti vlerësoi se potenciali për zgjerimin e bashkëpunimit mbetet i madh, veçanërisht në industri, energji, transport, teknologji të informacionit dhe komunikimit (TIK), si dhe në arsim profesional.
Në këtë kontekst, ai njoftoi se Prishtina do të mirëpresë javën e ardhshme edicionin e tretë të Forumit Ekonomik Gjermano-Kosovar, i cili synon të forcojë lidhjet ekonomike dhe mundësitë e investimeve ndërmjet dy vendeve.
Takimi u zhvillua në një moment kur, sipas Kurtit, Bundestagu gjerman ka vendosur që ushtarët gjermanë të vazhdojnë të qëndrojnë në Kosovë në kuadër të misionit paqeruajtës të KFOR-it.
Në përfundim të mesazhit të tij, kryeministri Kurti ritheksoi rëndësinë e Gjermanisë për të ardhmen evropiane të Kosovës, duke e cilësuar vendin si një partner të rëndësishëm në këtë rrugëtim./Albinfo.ch
