Kryeministri i Kosovës, Albin Kurti, ka kërkuar që Kosovës t’i jepet statusi i vendit kandidat për anëtarësim në Bashkimin Evropian dhe të hapen negociatat për anëtarësim, përcjell albinfo.ch.
Para mediave, në kuadër të Samitit të Procesit të Berlinit që po mbahet në Mal të Zi, Kurti tha se Kosova ka dëshmuar funksionalitet demokratik, stabilitet institucional dhe rritje ekonomike.
“Tani është koha që vendi ynë të marrë statusin e kandidatit dhe të hapë negociatat për hyrjen në BE. Mu për këtë do të bëj thirrje sot dhe çdo ditë, kundrejt çdo lideri të BE-së, që të kërkojnë opinionin nga Komisioni Evropian për këtë çështje”, u shpreh Kurti.
Kosova ka aplikuar për anëtarësim në Bashkimin Evropian në dhjetor të vitit 2022, por ende nuk e ka marrë statusin e vendit kandidat. Deklarata e Kurtit vjen në kuadër të përpjekjeve të institucioneve të Kosovës për të avancuar procesin e integrimit evropian./Albinfo.ch
