Kurti takon Thaçin shkurt: Do ta sjellim propozimin tonë për mandatim sa më parë

Albin Kurti ka takuar shkurtimisht sot Presidentin Hashim Thaçi ashtu siç qe paraparë.

Pas këtij takimi ai ka thënë se nga Thaçi iu kërkua që sa më parë të krijohet Qeveria.

“Ai kërkoi që ne ta bëjmë propozimin dhe këtë është e nevojshme që ta bëjmë me anë të një kërkese me shkrim. Sa më parë që të mundemi do t’ia sjellim propozimin tonë për kryeministrin e ardhshëm që ai duhet ta mandatojë”, ka thënë Kurti pas takimit.

“Ishte një takim i shkurt konsultativ pa efekte juridike. Isha bashkë me Kreshnik Ahmetin dhe këshilltarin ligjor, Blerim Sllamniku lidhur me fazën e ardhshme të konstituimit të institucioneve. Në këtë takim disa minutash dëgjova Presidentin që shprehi interesimin e tij për formimin të Qeverisë. Ai tha se: E di se ju nevojitet një kohë e caktuar për këtë”.

Kurti ka pohuar para medieve se ka gatishmëri për t’u takuar me drejtuesit e LDK-së për të folur për arritjen e marrëveshjes për bashkëqeverisje.