Kurti- Thaçit: Ambasador i vetëshpallur i shteteve mosnjohëse

Keystone

I pari i Lëvizjes Vetëvendosje, Albin Kurti, ka shkruar se Presidenti Hashim Thaçi është vetëshpallir ambassador i shteteve mosnjohëse.

Sipas Kurtit, Thaçi, ka ndërruar kompetencat dhe premtimet që nga koha e pozitës së kryeministrit deri tek pozita të cilën po mban aktualisht, atë të presidentit, shkruan Albinfo.ch.

“Nga premtimet brenda vendit si kryeministër, Thaçi ka kaluar te premtimet nga jashtë vendit si president. Dikur si kryeministër premtonte prej 200 mijë vendeve të punës në Kosovë e deri te formimi i komunave Kodra e Trimave, Has, Kievë, Hogosht e Zhegër. Sot si president premton bashkangjitje të Luginës dhe anëtarësim të Kosovës në OKB, NATO e BE”, ka shkruar Kurti në Facebook.

Sipas Kurtit, ‘Presidenti Thaçi po premton në emër të Presidentit Vuçiq se do të na bashkangjiten Presheva, Medvegja e Bujanoci; në emër të Presidentëve Putin dhe Xi se Kosova do të marrë ulëse në OKB; dhe, në emër të Spanjës, Sllovakisë, Rumanisë, Greqisë e Qipros se do të anëtarësohemi në NATO e BE’.

“Ky nuk është President i Kosovës por ambasador i vetëshpallur i këtyre instancave në emër të të cilave premton. Pra, Presidenti i Kosovës jo vetëm që nuk është President, por nuk është as i Kosovës. A thua e bën falas këtë punë ambasadori i vetëshpallur për shtetet që s’na kanë njohur? Nuk e di sa kush tjetër e paguan, por populli i Kosovës shumë shtrenjtë”, ka shkruar tutje Kurti.