Kurti: Viti 2024 është viti i pasaportës sonë

Kryeministri i Kosovës, Albin Kurti, të shtunën ka ndarë të dhëna për ngritjen e pasaportës së Kosovës në renditjen e shteteve të botës.

Ai tha se viti 2024 është vit i pasaportës së Kosovës.

“Ajo renditet më lart se kurdoherë në indekset ndërkombëtare të pasaportave, është në mesin e top 10 pasaportave të botës që kanë shënuar përmirësimin më të madh në dekadën e fundit, dhe me të sot mund të udhëtojmë në 38 vende të botës më shumë se sa në vitin e kaluar”, ka shkruar Kurti.

Tutje ka shtuar se tashmë qytetarët e Kosovës lëvizin të padiskriminuar.

“Qytetarët tanë tashmë lëvizin lirshëm dhe të padiskriminuar, pa pasur nevojë të presin para dyerve të ambasadave për të marrë vizë për udhëtime afatshkurtra në shumë shtete. Me liberalizim të vizave, me njohje të pasaportës sonë edhe nga shtete mosnjohëse, po e afrojmë Kosovën me Evropën dhe përtej”, shkruan ai.