Kuvendi i Kosovës konstituohet më 21 shkurt

Kryesia e Kuvendit të Kosovës do të mblidhet sot ku pritet të caktohet 21 shkurti data e konstituimit të Kuvendit.

Kjo bëhet pas vendimit të PDK-së për t’ia lënë postin e presidentit Behgjet Pacollit të Koalicionit për Kosovë të Re. Burim nga qeveria e Kosovës thonë se seanca e konstituimit të Kuvendit të Kosovës do të mbahet të hënën më 21 shkurt dhe jo më 24, siç ishte caktuar para pesë ditësh.

“Ushtruesi i Detyrës së Presidentit, Jakup Krasniqi, tashmë ua ka dërguar edhe zyrtarisht njoftimin të gjitha partive politike se seanca do të mbahet më 21 shkurt”, raporton KTV-ja.

Mundësinë për ta mbajtur seancën konstituive, tri ditë më herët seç ishte paraparë, e lejon edhe Rregullorja e Punës e Kuvendit.

Lajmin e ka konfirmuar edhe sekretari i këtij institucioni, Ismet Krasniqi, i cili ka njoftuar se për këtë do të mblidhet kryesia e Kuvendit.