Kuvendi i Kosovës ka miratuar me 67 vota për një rezolutë që synon forcimin e mbrojtjes së grave dhe parandalimin e dhunës në baza gjinore. Dokumenti trajton vrasjen e fundit në Vitomiricë të Pejës, rastet e tjera të vrasjes së grave, dhunën në familje ndaj grave dhe fëmijëve, si dhe përgjegjësinë e institucioneve në parandalimin e këtyre rasteve.
Përmes kësaj rezolute, kërkohet vëmendje më e madhe institucionale ndaj dhunës me bazë gjinore, si dhe forcimi i mekanizmave që garantojnë sigurinë dhe mbrojtjen e grave.
Po ashtu, dokumenti nënvizon rëndësinë e trajtimit serioz të çdo raportimi për dhunë në familje dhe nevojën për reagim të shpejtë nga institucionet përgjegjëse. Synimi është që rastet e dhunës të parandalohen me kohë dhe të mos përshkallëzohen në pasoja të rënda.
Rezoluta vë në pah gjithashtu domosdoshmërinë e bashkëpunimit më të mirë ndërmjet institucioneve, llogaridhënies për përgjegjësitë përkatëse dhe sigurimit të qasjes së grave dhe fëmijëve në shërbimet e nevojshme të mbështetjes dhe mbrojtjes.
