Lajçak: Marrëveshjet Serbi-Kosovë, gati për t’u nënshkruar

I dërguari i posaçëm i Bashkimit Evropian për dialogun Beograd-Prishtinë, Miroslav Lajçak, deklaroi se Serbia dhe Kosova kanë rënë dakord për një takim të një niveli të lartë dhe se disa marrëveshje mes dy vendeve janë gati për t’u nënshkruar.

Deklaratën Lajçak e dha këtë të diel gjatë një konference ndërkombëtare të Forumit të 15-të në Dubrovnik.

Në fjalimin e tij, Lajçak nuk bëri me dije se çfarë përfshijnë këto marrëveshje.

Muajin e kaluar ai njoftoi se Serbia dhe Kosova kishin rënë dakord për miratimin e një udhërrëfyesi për zbatimin e marrëveshjeve energjetike në kuadër të dialogut të Brukselit, shkruajnë mediat kosovare, përcjell albinfo.ch.

Çdo marrëveshje e arritur mes dy vendeve do të ishte e para e nënshkruar nga të dyja palët që kur Lajçak u angazhua në bisedimet për normalizimin e marrëdhënieve mes Prishtinës dhe Beogradit.