Largimi nga puna për shkak të përdorimit të internetit zyrtar, i padrejtë

Përgjimi i komunikimit elektronik të punëtorit përbën shkelje të privatësisë së tij, është qëndrim i gjykatës

Gjykata Evropiane për të Drejtat e Njeriut në Strasburg e ka shpallur të paligjshëm pushimin nga puna të një personi për shkakun se ka shfrytëzuar privatisht internetin në vendin e punës. Përgjimi i komunikimit elektronik të punëtorit përbën shkelje të privatësisë së tij, është qëndrim i gjykatës, shkruan srf.ch.

Ankesën për këtë e ka bërë një inxhinier rumun, i cili është pushuar nga puna për arsyen e përmendur. Ai në Rumani ishte ankuar për këtë padrejtësi që i ishte bërë por pa sukses, transmeton albinfo.ch. Sipas instancave juridike rumune, ndërmarrja ka vepruar në bazë të të drejtës së punës në fuqi dhe inxhinieri ka qenë i informuar në lidhje me rregullat.

Madje edhe njëra nga dhomat e vogla të Gjykatës së Strasburgut e kishte ndarë këtë mendim, duke e hedhur poshtë ankesën e rumunit, në janar të vitit 2016.

Por ai e kishte shtyrë çështjen më tutje duke ushtruar sërish ankesë. Kështu, ankesa e tij është shqyrtuar nga Dhoma e Madhe e Gjykatës për të Drejtat e Njeriut në Strasburg, e cila përfundimisht i ka dhënë të drejtë rumunit, përcjell albinfo.ch. Ky vendim është i plotfuqishëm dhe me këtë, do të ketë ndikim edhe në 47 vendet anëtare të Këshillit Evropian, ku hyn edhe Zvicra, Shqipëria bashkë me shtetet tjera të Ballkanit por jo edhe Kosova.