LB: Punësime militantësh në Telekom

Për gjendjen në Telekomin e Kosovës përmes një deklarate për media ka reaguar edhe Lëvizja për Bashkim.

Kjo parti thotë se çdo qeveri që nga paslufta qasjen ndaj këtij operatori të rëndësishëm ekonomik të Kosovës e kanë krejtësisht të gabuar, përcjell albinfo.ch.

“Qeveria Telekomin e sheh dhe e trajton vetëm si ndërmarrje që i shërben krijimit të klientelës politike e në dëm të afarizmit ekonomik. Nuk ka se si të shpjegohet ndryshe punësimi i mbi 100 militantëve partiakë, në kohën kur vet qeveria po thotë se kjo ndërmarrje edhe ashtu është stërngarkuar me punëtorë dhe në kohën kur qeveria flet për ulje të pagave në këtë ndërmarrje. Në gjendje të njëjtë janë edhe KEK-u, Trepça, Posta, TRAINKOS-i, etj.! Në të gjitha ndërmarrjet publike qasja ka qenë e njëjtë! Që nga përzgjedhja e bordeve me militantë partiakë e pa kriter profesional e deri te punësimet kryekëput familjare e partiake!”, theksohet në reagim.