LDK-ja nuk i bashkohet turit “lobues-turistik” të Veselit

Grupi Parlamentar i LDK-së, vizitën e kryetarit të Kuvendit, Kadri Veseli dhe një pjesë të deputetëve në disa vende të BE-së  e ka quajtur tur lobues – turistik.

Kjo parti konsideron se liberalizimi i vizave nuk sigurohet përmes veprimeve të tilla, përcjell albinfo.ch.

“Për të kontribuuar në përmbushjen e kritereve për liberalizim të vizave, Kryetari i Kuvendit duhet të sigurojë mbarëvajtjen e punëve të Kuvendit të Kosovës për të aprovuar ligjet që janë të lidhura me MSA-në dhe në mënyrë specifike me Agjendën e Reformave Evropiane.

Si kryetar i partisë në koalicion, Kryetari i Kuvendit duhet të kujdeset që Qeveria të përmbushë obligimet karshi agjendës për integrim evropian të Kosovës. Udhëtimet e tilla janë shpenzim i panevojshëm i parasë publike dhe dërgojnë mesazh të paqartë tek shtetet e BE-së”, thuhet në reagimin e GP-së së kësaj partie.