LDK-ja u drejtohet qytetarëve: Mos e shitni votën!

Ilustrim

Lidhja Demokratike e Kosovës u ka bërë thirrje të gjitha institucioneve përkatëse që të ushtrojnë kompetencat e tyre në mënyrë që të mundësohen zgjedhje të drejta dhe një proces i mirëfilltë.

Shtabi zgjedhor i LDK-së përmes një konference për shtyp ka shprehur shqetësimet për disa parregullsi dhe disa shkelje ligjore, të cilat kanë ndodhur në disa vendvotime.

Doruntina Maloku, zëdhënëse e shtabit zgjedhor, ndër të tjera tha se LDK-ja ka një bashkëpunim të shkëlqyer me të gjitha organet e zbatimit të ligjit, në mënyrë që të mundësohet një proces i drejtë.

“Ne bëjmë thirrje që të gjitha institucionet e zbatimit të ligjit të ushtrojnë kompetencat e tyre që të organizohet një proces fer dhe demokratik, në të cilin respektohen në përpikëri vullneti i qytetarëve”, tha Maloku.

Po ashtu ajo i ka ftuar qytetarët që të ushtrojnë të drejtën e tyre për të votuar, ajo theksoi se qytetarët nuk duhet ta shesin besimin dhe votën e tyre, sepse sipas saj, duhet të mbrohen vlerat demokratike për të cilat kanë luftuar. Kujtojmë se LDK-ja ka 2 mijë e 843 komisionarë dhe 5 mijë e 870 vëzhgues, të cilët do ta monitorojnë procesin e zgjedhjeve, përcjell albinfo.ch.