“Letra e Zotit” e Einsteinit shitet për 2,9 milionë dollarë

Letra e fizikanit të famshëm Albert Einstein dërguar filozofit gjerman Eric Gutkind, në të cilën ai shpalos pikëpamjet e tij rreth Zotit, fesë dhe identitetit hebre, është shitur në ankand për 2,9 milionë dollarë, transmeton albinfo.ch.

Sipas BBC, letra e shkruar me dorë është shitur në Shtëpinë e Ankandeve Christie’s në New York, në një ankand i cili filloi me çmimin 1,5 milion dollarë. Nobelisti Einstein letrën e ka shkruar në vitin 1954, në moshë 74 vjeç, ndërsa aty shkencëtari me famë shpalos idetë e tij rreth Krishterimit, Zotit dhe identitetit hebre.

Në letër, Einstein pohon se ideja mbi Zotin nuk ka kuptim për të dhe se fetë përbëhen nga legjendat. “Fjala Zot për mua është thjesht një shprehje, produkt i dobësive të njeriut. Bibla nuk është gjë tjetër veçse një përmbledhje e legjendave të respektueshme, por prapë primitive”, shkruan Einstan në letrën e tij, e njohur si “Letra e Zotit”. Me Teorinë e Përgjithshme të Relativitetit, të cilën e paraqiti në fillim të shekullit të njëzet, Einstein kishte bërë revolucion në historinë e shkencës, duke mposhtur paradigmat që ishin adoptuar në fizikë deri në atë kohë