Lidhet Prishtina me Bernën

Pas Cyrihut, Gjenevës dhe Baselit me Kosovën do të lidhet edhe Berna

Kompania e njohur zvicerane “Helvetic Airlines” ka lansuar sot fluturimet në destinacionet Prishtinë-Bernë-Prishtinë, raportojnë mediat në Prishtinë.

Kjo linjë starton për herë të parë, njëkohësisht është edhe kompania e parë që hyn në treg pas marrjes se Aeroportit të Prishtinës me koncension nga koncorsiumi LIMAK –Aeroport de Lyon MAS.

Fillimisht do të ketë vetëm një fluturim në javë Bernë-Prishtinë-Bernë deri më datën 15 qershor, ndërsa pas kësaj date është thënë se varësisht nga tregu, mund  të ketë deri në 4 fluturime në javë.

Përfaqësuesja e kompanisë ajrore “Helvetic Airlines”, Nafalie Scheurer, tha se kjo kompani në të ardhmen e afërt do të zgjerojë fluturimet Prishtinë- Bernë, linjë kjo e cila fillimisht do të realizohet çdo të hënë.

Me rastin e lëshimit të linjës së re Prishtinë – Bernë, edhe drejtues të Aeroportit Ndërkombëtar të Prishtinës “Adem Jashari”, janë zotuar se do të punojnë në zhvillimin e aeroportit dhe lehtësimin e udhëtimit për të gjithë shtetasit e Kosovës, të cilët jetojnë jashtë vendit.

“Ne do të mundohemi të rrisim fluturimet, gjithashtu të rrisim edhe fluturimet për Bernë dhe Zvicër, dhe mendoj që do të kemi sukses në 20 vitet e ardhshme. Ne do të zhvillojmë këtë aeroport aq sa kemi mundësi dhe besojmë se do t’i rrisim fluturimet në të ardhmen”, theksoi Ferda Yakar, drejtori menaxhues i Aeroportit „Limak Kosovo International”.

Tani, Aeroporti i Prishtinës mbulon të gjitha destinacionet e shtetit zviceran.