Linja hekurudhore Gjenevë-Lozanë drejt mbingarkesës

Politikanët në Zvicrën frankofone po kritikojnë gjithashtu Bernën, duke thënë se politikat federale të transportit po favorizojnë rajone të tjera dhe po lënë pas pjesën perëndimore të vendit

Një nga linjat më të rëndësishme hekurudhore në Zvicër, ajo mes Gjenevës dhe Lozanës, po përballet me presion gjithnjë e më të madh për shkak të rritjes së numrit të udhëtarëve dhe mungesës së kapaciteteve.

Sipas një analize të RTS mbi të dhënat publike, disa trena të mbrëmjes në këtë linjë tashmë janë ndër më të mbushurit në gjithë vendin, ndërsa numri i udhëtarëve pritet të afrohet në rreth 90 mijë pasagjerë në ditë, transmeton albinfo.ch.

Autoritetet e transportit në kantonet Gjenevë dhe Vaud paralajmërojnë se investimet në infrastrukturë nuk kanë arritur të ndjekin ritmin e rritjes ekonomike dhe demografike të rajonit. Sipas tyre, rrjeti është aq i ngarkuar sa edhe incidente të vogla mund të shkaktojnë vonesa në të gjithë sistemin.

Këshilltari shtetëror i Gjenevës, Pierre Maudet, deklaroi se rrjeti është “i saturuar”, ndërsa projektet për zgjerimin e kapaciteteve kanë pësuar vonesa të vazhdueshme.

Politikanët në Zvicrën frankofone po kritikojnë gjithashtu Bernën, duke thënë se politikat federale të transportit po favorizojnë rajone të tjera dhe po lënë pas pjesën perëndimore të vendit.

Linja Lozanë-Gjenevë konsiderohet një nga korridoret më të rëndësishme hekurudhore në Romandie dhe lidh Gjenevën me pjesën tjetër të rrjetit kombëtar, përfshirë lidhjet drejt Cyrihut, Bernit, Bazelit dhe Italisë.

---