Lirohet avokati që lajmëroi rastin e dhunimit të vajzës nga Drenasi

Avokati Halilaj është arrestuar mëngjesin e sotëm në cilësinë e të dyshuarit se edhe ai ka abuzuar me viktimën

Pas raportimeve se u arrestua, avokati Gazmend Halilaj është liruar.

Kështu ka bërë të ditur Halilaj përmes Facebook, i cili shtoi se pasdite do të merret me punë të përditshme.

“Të dashur miq. Jam i lirë. Pasdite jam në zyrë me punë të përditshme. Në mbrëmje, normalisht në shtëpi”, ka shkruar Halilaj.

“Dje e raportova skandalin e radhës nga hetuesit e IPK-së që i dhanë dëshmi gazetares së KTV-së lidhur me privatësinë e viktimës të rastit në Drenas. Në shenjë hakmarrjeje, të njëjtit sot me arrestuan”, kishte shkruar Halilaj në Facebook.

Avokati Halilaj është arrestuar mëngjesin e sotëm në cilësinë e të dyshuarit se edhe ai ka abuzuar me viktimën.

Ai e ka nxjerrë në publik rastin për vajzën nga Drenasi, e cila raportohet të jetë keqpërdorur seksualisht nga fillimisht një mësimdhënës, pastaj nga polici hetues, tek i cili viktima kishte shkuar për ta paraqitur rastin, dhe nga gjinekologu ku kishte kryer abort viktima.

---