Lojërat tradicionale në Dukagjin mbledhin bashkatdhetarët

Në hapje të këtyre lojërave organizatorët thanë se lojërat tradicionale bashkuan bashkatdhetarë nga të gjitha trevat shqiptare

Edhe sivjet, si çdo vit tjetër, lojërat tradicionale në rajonin e Dukagjinit kanë mbledhur bashkatdhetarë nga të gjitha trevat shqiptare. Lojërat u zhvilluan në amfiteatrin natyror në Bogë të Rugovës, ndërsa demonstrimi i shkathtësisë fizike është veçantia kryesore.

Në hapje të këtyre lojërave me karakter garues, organizatorët thanë se rajoni i Rugovës së Pejës në vazhdimësi kulturës shqiptare i dha vlera të larta artistike, përfshirë këtu edhe lojërat tradicionale, të cilat bashkuan bashkatdhetarë nga të gjitha trevat shqiptare, raporton rtk.

Profesori Zymer Neziri tha se lojërat tradicionale të Rugovës janë të hershme, të cilat me ca ndërprerje e vazhduan jetën e vet deri në ditët e sotme, përcjell Albinfo.ch.

Në emër të Qeverisë së Kosovës, këto aktivitete tradicionale i përshëndeti zëvendëskryeministrja Donika Gërvalla – Shwarc.

Në garat në rrëzimin e duarve vendin e parë e zuri Granit Kelmendi, në hedhjen e shigjetës, Liridon Cukaj, në garat në tërheqjen e litarit vendin e parë e zuri ekipi i Haxhajve, ndërsa në disiplinën e mundjes fitues u shpall Valdrin Mekaj./Albinfo.ch

---