Luanda Domi shpërblehet me çmimin ndërkombëtar në sigurinë kibernetike

Një tjetër sukses është shënuar në fushën e sigurisë kibernetike. Luanda Domi, eksperte e njohur e kësaj fushe me prejardhje nga Kosova, është nderuar me çmimin prestigjioz “Cybersecurity Woman of the Year 2025”, në kategorinë Supporter, transmeton albinfo.ch.

Ceremonia e ndarjes së çmimeve u mbajt më 3 gusht në Las Vegas, ku u mblodhën profesionistë të shquar nga mbarë bota për të festuar kontributet e grave në sigurinë kibernetike.

E emocionuar pas marrjes së çmimit, Domi u shpreh mirënjohëse për mbështetjen që ka marrë gjatë rrugëtimit të saj profesional. Në një postim në Facebook, ajo falënderoi familjen, miqtë dhe të gjithë ata që e votuan, duke theksuar:

“Mbështetja juaj ka pasur domethënie të jashtëzakonshme për mua. Jam krenare që do ta sjell këtë çmim në Kosovë—dhe shpresoj që të jetë një kujtesë e vogël për çdo vajzë të re: zëri yt ka vend në sigurinë kibernetike, në udhëheqje, në çdo dhomë. Mos u ndal. Bota ka nevojë për ty.”

Përveç këtij suksesi, Luanda Domi është përzgjedhur edhe në listën e ngushtë për çmimin “Cybersecurity Woman of the World”, që do të ndahet më 25 shtator në Itali  një tjetër dëshmi e vlerësimit ndërkombëtar për angazhimin e saj të palëkundur në këtë fushë jetike të teknologjisë. /Albinfo.ch