Lumengo kandidon sërish

Përkundër vendimit gjyqësor që e ngarkon për falsifikim të votave, ai thotë se nuk e ka ulur kurrë kokën

Politikani kontrovers me prejardhje afrikane, deputeti federal aktual Ricardo Lumengo, do të kandidojë sërish për këtë post në zgjedhjet nacionale që mbahen në vjeshtë.

I përballur me akuzat për falsifikim të votave, ai vitin e kaluar qe detyruar të braktisej nga partia e tij (Partia Socialdemokrate) dhe të vazhdonte punën e deputetit pa parti.

Kandidimin e tij të sërishëm për Parlamentin Nacional, Lumengo e ka bërë publik përmes një videoje të publikuar në Youtube.

“Kam kënaqësinë të shpall kandidaturën time”, thotë Lumengo në këtë video. “Unë do ta mbroj ulësen time në Parlamentin Nacional këtë vjeshtë”, shkruan 20minuten.ch.

Ai pastaj ka thënë se përkundër vendimit gjyqësor të shkallës së parë që e ngarkon për falsifikim të votave, ai nuk e ka ulur kurrë kokën. “Sepse jam i bindur për pafajësinë time”, ka vazhduar Lumengo.