LVV-ja aksion simbolik kundër pranisë së madhe të serbëve në panair

Aktivistët kanë shpalosur një pankartë me mbishkrimin “jo normalizimit të hegjemonisë ekonomike të Serbisë në Kosovë”

Lëvizja Vetëvendosje, përmes një aksioni simbolik, ka kundërshtuar pjesëmarrjen e bizneseve të Serbisë në panairin “Prishtina 2018”, në të cilin po merr pjesë vetëm një kompani nga Shqipëria.

Aktivistët kanë shpalosur një pankartë me mbishkrimin “jo normalizimit të hegjemonisë ekonomike të Serbisë në Kosovë”, përcjell albinfo.ch.

Por, pasi ata nuk janë lejuar nga Policia e Kosovës që t’i ofrohen objektit ku po mbahej panairi, pankartën e kanë vendosur në rrethojat e këtij e këtij objekti.

Deputeti i Kuvendit të Kosovës nga radhët e Lëvizjes Vetëvendosje, Arbër Rexhaj, ka kërkuar që të bojkotohen produktet serbe në këtë panair. “Prej 170 bizneseve, sa janë në këtë panair, 70 prej tyre janë nga Serbia, biznese këto që kanë hapësirën qendrore në sipërfaqe prej 500 metra katror. Duke pasur parasysh që vlera e eksportit të Serbisë në Kosovë arrin shifrën prej rreth gjysmë miliard euro, ajo tash po pretendon që këtë shifër edhe ta dyfishojë. Ndërkaq, Shqipëria eksporton në Kosovë në vlerë prej vetëm 150 milionë eurosh. Këto shifra tregojnë shumë për karakterin e shtetit dhe orientimin e tij”, është shprehur Rexhaj.