Macron uron Magyarin pas fitores: Të ndërtojmë një Evropë më të fortë dhe sovrane

Keystone (Ludovic Marin/Pool Photo via AP)

Presidenti i Francës, Emmanuel Macron, ka uruar liderin e opozitës në Hungari, Péter Magyar, pas fitores së tij në zgjedhje, gjatë një bisede telefonike mes tyre.

Macron theksoi se Franca e mirëpret pjesëmarrjen demokratike dhe angazhimin e qytetarëve hungarezë ndaj vlerave të Bashkimit Evropian.

Në një postim në Facebook, ai tha se kishte folur me Magyarin për ta përgëzuar për suksesin elektoral dhe vlerësoi këtë rezultat si shenjë të përkushtimit ndaj demokracisë dhe integrimit evropian.

“Kam biseduar me Péter Magyar për ta përgëzuar për fitoren në Hungari. Franca e mirëpret këtë rezultat për pjesëmarrjen demokratike dhe përkushtimin ndaj vlerave të BE-së. Së bashku duhet të ndërtojmë një Evropë më sovrane, për sigurinë, konkurrueshmërinë dhe demokracinë tonë”, u shpreh Macron.