Madridi përgatitet për një Brexit të Britanisë pa marrëveshje

Spanja njoftoi të premten se ka miratuar një dekret për të minimizuar efektet e një Brexiti të mundshëm pa marrëveshje mbi jetën e më shumë se 300 000 britanikëve që jetojnë në territorin e saj dhe që të mbrojë të drejtat e tyre.

Nga ana tjetër, Madridi ka kërkuar që Londra të bëjë të njëjtën gjë nga ana e saj për 150 000 spanjollët që jetojnë në Britani të Madhe, shkruan atsh, përcjell albinfo.ch.

“Bëhet fjalë që të gjendet një mënyrë që asnjë qytetar britanik apo spanjoll të mos mbesë pa mbrojtje, as ai dhe as të afërmit e tij”, insistoi para medias Carmen Calvo, zëvendëspresidente e qeverisë socialiste të Pedro Sanchez.