Mali i Zi bëhet kombi i 29-të kontribues në KFOR

Një oficer i stafit nga Mali i Zi i është bashkuar personelit të 28 shteteve të cilët aktualisht kanë trupa kontribuese në KFOR.

Prej sot Mali i Zi është kombi i 29-të që kontribuon në misionin e NATO-s në Kosovës. Komandanti i KFOR-it, Gjeneral Majori Salvatore Cuoci kryesoi ceremoninë mikpritëse të organizuar sot në kampin Film City, ku ishte prezent, Ministri i Mbrojtjes i Malit të Zi, Predrag Boshković. Një oficer i stafit nga Mali i Zi i është bashkuar personelit të 28 shteteve të cilët aktualisht kanë trupa kontribuese në KFOR.

“Për një vend fqinj si Mali i Zi është e rëndësishme për të kontribuar në mjedisin e qetë dhe të sigurtë dhe lirinë e lëvizjes në Ballkanin Perëndimor dhe duke zgjedhur të jetë pjesë e një operacioni si KFOR-i, është një hap konkret drejt normalizimit të rajonit,” tha komandanti i KFOR-it.

Ky vendim i Malit të Zi ka ngjallur reagime në Serbi. Ministri i Mbrojtjes së Malit të Zi ka komentuar reagimet duke i quajtur si reagime emocionale.

“Ne e kemi lënë të shkuarën pas dhe jemi fokusuar në të ardhmen, e që është integrimi euro-atlantik që them se do të duhej të vlente për të gjitha shtetet e Ballkanit”, ka thënë ai

 

---