Maqedoni: Vazhdojnë pritjet e gjata për pasaporta

Qytetarët në Maqedoninë e Veriut po vazhdojnë të aplikojnë për ndërrimin e pasaportave, teksa afati i fundit për qarkullim me pasaportën e vjetër është 12 shkurti.

Megjithatë, pritjet janë të gjata dhe nga qytetarët po kërkohet që krahas letërnjoftimeve dhe patent shoferëve, punonjësit policorë të shpërndajnë në shtëpi edhe pasaportat.

“Ky është opsioni më i mirë, por duhej më herët. Edhe pasaportat mund t’i sillnin në shtëpi, edhe ai është dokument. Kur na fotografuan, i dhamë shenjat e gishtërinjve, lirshëm mund të na i sillnin në shtëpi”, tha një qytetar për alsat, përcjell albinfo.ch.

Sa i përket numrit të dokumenteve të ndryshuara, nga Ministria e Punëve të Brendshme bën të ditur se nga data 05.07.2021 deri më 16.01.2024 janë shpërndarë 1,050,439 letërnjoftime, 1,211,776 pasaporta dhe 546,741 patentë shoferë. Afati i ndryshimit të dokumenteve personale skadon më 12 shkurt. Pas kësaj date, gjoba nuk do të ketë, por qytetarët me dokumentet e vjetra nuk do të mund të dalin jashtë shtetit.