Maqedoni: Vlefshmëria e pasaportave të skaduara të mërgimtarëve vazhdon deri në fund të vitit

pasaporta

Në Maqedoninë e Veriut vlefshmëria e pasaportave të skaduara të mërgimtarëve do të vazhdohet deri në fund të vitit, transmeton albinfo.ch.

“Për t’u dalë në ndihmë shtetasve tanë jashtë vendit, pasaportat e të cilëve kanë skaduar ose vlefshmëria e tyre skadon këtë vit, do të bëhen ndryshime ligjore, në mënyrë që vlefshmëria e këtyre dokumenteve të udhëtimit të zgjatet deri në fund të vitit”.

Këtë e paralajmëroi sot ministri i Punëve të Jashtme, Bujar Osmani. Ai theksoi se diplomatët tanë me ekipe mobile do t’i fotografojnë shtetasit tanë jashtë vendit për t’u lëshuar atyre pasaporta të reja, me çka deri më tani janë lëshuar mbi 7.000 dokumente udhëtimi, por se ka problem me shtetasit e vendit me pasaporta të skaduara që janë në Kinë.

“Nëse ekipet mobile shkojnë në Kinë për t’i fotografuar 12 shtetasit tanë, ata do të duhet të jenë në karantinë për 30 ditë. Prandaj, gjetëm një zgjidhje tjetër, Ministria e Punëve të Brendshme ta zgjasë vlefshmërinë e pasaportave deri në fund të vitit, me ndryshim të ligjit, në mënyrë që qytetarët t’i përdorin pasaportat aktuale me datë të skaduar”, tha Osmani.