Maqedonia kundër bisedimeve për ndarjen e Kosovës

Kryetari i Maqedonisë është deklaruar kundër bisedimeve për ndarjen e Kosovës, sepse kjo sipas tij mund të destabilizonte tërë rajonin

Në një intervistë për “Tanjug”, kryetari i Maqedonisë, Gjorgji Ivanov, ka thënë se vendi i tij me vëmendje po ndjek situatën në Kosovë dhe raportet mes Prishtinës dhe Beogradit.

“Jemi të vetëdijshëm se zhvillimet e tashme vështirësojnë bisedimet, por mendoj se ato duhet të vazhdojnë, për të gjitha çështjet për të cilat mund të shënohet përparimi”, ka thënë Ivanovt, transmetojnë mediet në Prishtinë .

Bisedimet eventuale për ndarjen e Kosovës, sipas Ivanovit, “do të mund të sillnin pasoja të cilat do t’i tejkalojnë të gjitha telashet që i kemi tash”.

Ivanov ka thënë se pavarësia e Kosovës është fakt i pranuar për shumicën e shteteve në rajon dhe në Evropë dhe se ndonëse i kupton qëndrimet serbe, duhet tentuar “që raportet të mos përkeqësohen më shumë”.

“Ne nuk mund t’i themi Serbisë ose Kosovës se si t’i rregullojnë raportet e tyre”, ka thënë presidenti maqedonas, “por duhet të luftojmë për interesat tona, që të mos ketë destabilizim tjetër të rajonit”.