Marsh protestues kundër izolimit të Kosovës

Ndaj këtij marshi ka reaguar Zyra Ndërlidhëse e Komisionit Evropian në Prishtinë

Aktivistët e rrjetit të organizatave joqeveritare “Koalicioni për Demokraci” kanë organizuar të martën marshin protestues në Prishtinë, kundër, siç u tha, izolimit të Kosovë nga Bashkimi Evropian. Sejdi Demiri, drejtues i këtij rrjeti, ka thënë se kërkesa e tyre është realizimi i së drejtës elementare për të lëvizur lirshëm dhe që prodhuesit kosovarë të eksportojnë në Bashkimin Evropian, raporton Radio Evropa e Lirë.

Aktivistët e këtij rrjeti kanë marshuar përgjatë rrugës “Nëna Terezë”, duke bartur pankarta me slogane që përmbanin kundërshtime ndaj mbetjes së Kosovës jashtë regjimit të liberalizimit të vizave dhe kufizimeve tjera.

Sejdi Demiri, drejtues i rrjetit të organizatave joqeveritare “Koalicioni për Demokraci”, ka thënë se tubimi i aktivistëve të këtij rrjeti ka për qëllim shprehjen e indinjatës së thellë për, siç i ka quajtur ai, padrejtësitë dhe padenjësitë që Bashkimi Evropian po u bën qytetarëve të Kosovës.

Ilir Buzhala, aktivist i rrjetit “Koalicioni për Demokraci”, ka thënë se fillimisht institucionet vendore duhet të krijojnë kushtet që qytetarët e Kosovës të fitojnë mundësinë e qarkullimit të lirë në vendet evropiane.

Në anën tjetër, Zyra Ndërlidhëse e Komisionit Evropian në Prishtinë ka reaguar ndaj marshit të rrjetit “Koalicioni për Demokraci”, duke thënë se “nuk është e vërtetë se Bashkimi Evropian ka vendosur t’i ndalë preferencat tregtare me Kosovën”.

 Në një komunikatë shtypi, kjo Zyrë, ka bërë të ditur se Komisioni Evropian ka adoptuar më 22 shkurt 2010, propozimin për të zgjatur afatin e masave tregtare deri më 31 dhjetor të 2015-ës.

Në këtë komunikatë, gjithashtu ngrihet edhe motivi i dytë i marshimit të së martës – ai i liberalizimit të vizave, duke thënë se kjo çështje dhe ajo e preferencave tregtare, nuk ndërlidhen mes vete. Protesta ka kaluar në mënyrë paqësore ndërsa për sigurinë janë kujdesur forcat e Policisë së Kosovës.