Kriminaliteti në Zvicër ka shënuar rritje ndërmjet viteve 2022 dhe 2025, ndërsa mashtrimet dhe vjedhjet janë ndër veprat penale që kanë ndikuar më së shumti në këtë trend.
Këto janë gjetjet e studimit të fundit “Crime Survey 2025”, të realizuar nga Universiteti i Shkencave të Aplikuara të Cyrihut (ZHAW) dhe Universiteti i St. Gallenit.
Sipas rezultateve, 15.9% e personave të anketuar në vitin 2025 deklaruan se kishin qenë viktima të mashtrimeve gjatë 12 muajve të mëparshëm. Në anketën e vitit 2022, kjo përqindje ishte vetëm 8.4%, transmeton albinfo.ch.
Mashtrimet në internet, shqetësimi kryesor
Një nga gjetjet më shqetësuese të studimit është përhapja e mashtrimeve në hapësirën digjitale.
Rreth 75% e mashtrimeve të raportuara nga të anketuarit kanë ndodhur në internet, përfshirë platformat e rrjeteve sociale.
Kjo tregon se mashtrimet digjitale përbëjnë një pjesë të konsiderueshme të rasteve me të cilat përballen qytetarët në Zvicër.
Rriten edhe vjedhjet dhe ngacmimet seksuale
Përveç mashtrimeve, studimi ka evidentuar rritje edhe në disa kategori të tjera të kriminalitetit.
Përqindja e personave që raportuan vjedhjen e sendeve personale u rrit nga 3% në vitin 2022 në 4.3% në vitin 2025.
Ndërkohë, vjedhjet nga automjetet shënuan rritje nga 1.2% në 2.7%.
Rritje është regjistruar edhe te ngacmimet seksuale, ku përqindja e viktimave është rritur nga 4.3% në 6.2%. Në anën tjetër, studimi nuk ka konstatuar rritje të dhunës seksuale.
Qytetarët ndihen më pak të sigurt
Rezultatet tregojnë gjithashtu se ndjenja e sigurisë në mesin e popullsisë zvicerane ka pësuar rënie.
Në vitin 2022, rreth 87.6% e të anketuarve deklaronin se ndiheshin të sigurt në lagjen e tyre gjatë natës. Në vitin 2025, kjo përqindje ra në 83.1%.
Po ashtu, 37.9% e pjesëmarrësve në studim konsiderojnë se prania e policisë në hapësirat publike është e pamjaftueshme, krahasuar me 28.9% në vitin 2022.
Megjithatë, besimi i qytetarëve në polici vazhdon të mbetet i lartë.
Ekspertët: Zvicra vazhdon të jetë vend i sigurt
Studiuesit theksojnë se rritja e rasteve të kriminalitetit nuk mund të shpjegohet vetëm me gatishmërinë më të madhe të qytetarëve për t’i raportuar ato.
Sipas Dirk Baier, bashkëdrejtues i projektit, përqindja e viktimave që raportojnë rastet në polici ka mbetur kryesisht e pandryshuar, gjë që sugjeron një rritje reale të kriminalitetit.
Nga ana tjetër, Nora Markwalder, bashkëdrejtuese e studimit, thekson se zhvillimet duhet të merren seriozisht, por pa krijuar alarm të panevojshëm.
Pavarësisht rënies së ndjenjës së sigurisë dhe shtimit të mashtrimeve, shumica e qytetarëve vazhdojnë ta konsiderojnë Zvicrën një vend të sigurt për të jetuar.
Studimi është bazuar në përgjigjet e rreth 13,500 personave të moshës 16 deri në 80 vjeç që jetojnë në Zvicër.
